Dy persona janë vënë në pranga dhe një tjetër është shpallur në kërkim, nga autoritetet në Ekuador, pasi akuzohen se kanë favorizuar mafian shqiptare, dhe më konkretisht grupin që drejtohet nga Dritan Gjika.
Sipas mediave vendase në pranga kanë rënë dy zyrtarët e drejtësisë, Douglas C. dhe Luis S., gjatë një operacioni të përbashkët mes Policisë Kombëtare dhe Prokurorisë së Përgjithshme të Shtetit. Ndërkohë që në kërkim është shpallur gjyqtari Lenin G., i cili gjithashtu akuzohet se ka favorizuar anëtarët e mafias shqiptare.
Në një njoftim të prokurorisë vendase, thuhet se personat e arrestuar kishin dhënë ‘në mënyrë të parregullt, masa sigurie në favor të 3 të pandehurve, që kanë qenë pjesë e mafias shqiptare. Këta shtetas, të cilët ndodheshin në paraburgim për krim të organizuar dhe pastrim parash, dyshohet se ishin pjesë e një rrjeti kriminal të drejtuar nga Dritan G”.
Gjithashtu, Prokuroria kërkoi mbështetje nga Policia për të gjetur gjyqtarin Lenin G., nga e njëjta Njësi Gjyqësore, i cili do të kishte urdhëruar lirimin e të pandehurve dhe për të cilin është në pritje një urdhër arresti. Aktualisht ai është i arratisur, dhe nuk është lokalizuar ende nga policia.
Kush është Dritan Gjika?
Dritan Gjika, i shpallur në kërkim si kreu i mafias shqiptare që operon në Ekuador, akuzohet se bashkë me 4 persona, Mario S, Carina E, Carlos G dhe Pablo H, kanë bashkëpunuar për pastrimin e mbi 31 milionë dollarëve të ardhura nga trafiku i drogës. Shtatë kompani apo persona juridikë janë gjithashtu në proces. Ndaj tyre gjyqtari ka urdhëruar ndalim parandalues, sekuestrim të pasurisë dhe bllokimin e llogarive. Ai ka urdhëruar policinë që ta lokalizojë dhe t’i kapë të akuzuarit, raportojnë mediat në Ekuador.
