Ndërkohë që fasha 800 kWh pritet të vendoset në muajin nëntor, kryeministri Rama ka folur sërish në lidhje me rritjen e çmimit të energjisë elektrike.
Në konferencën e përbashkët me presidenten e Komisionit Europian, Ursula von der Leyen, Rama tha se vendosja e fashës nuk është rritje e çmimit, por një limit që nuk prek konsumin e energjisë për nevojat bazike.
Rama theksoi se nëse do kursehet arsyeshëm, mundësia që ne të veprojmë ndryshe me fashën krijohet, sepse në fund të fundit fasha vendoset për kursim.
Sipas Ramës në mbi 1 milion abonentë familjarë, 1.2 më saktë janë maksimumi 60 mijë familje, të cilat konstatohet se dalin mbi këtë tavan në kulmin e nevojës për ngrohje apo ftohje.
“Ne nuk do të rrisim çmimin e energjisë, s’e kemi thënë kurrë këtë gjë. Vendosja e fashës 800 kËh nuk është rritje e çmimit të energjisë, është vendosja e një tavani, nën të cilin çdo familje mund të kryejnë të gjitha nevojat bazike pa përjashtim, pa pasur nevojë për më shumë, kjo është e llogaritur. Dhe në mbi 1 milion abonentë familjarë, 1.2 më saktë janë maksimumi 60 mijë familje, të cilat konstatohet se dalin mbi këtë tavan në kulmin e nevojës për ngrohje apo ftohje. Kjo është komplet gjë tjetër me fjalorin rritje e energjisë”, deklaroi kryeministri Edi Rama ndër të tjera në konferencën e përbashkët me presidenten e Komisionit Europian.
