Mjekja onkologe e Spitalit Amerikan, Esmeralda Sera, është dënuar nga gjykata e Tiranës me akuzën e “falsifikimit të dokumentave shëndetësore” dhe “shpërdorim detyre.”
Për të dyja akuzat mjekja Sera është dënuar fillimisht me 6 muaj burgim, por për shkak të gjykimit të shkurtuar, gjykata urdhëroi që ajo t’a zëvendësojë dënimin duke kryer 80 orë punë në shërbim të publikut.
Mjekja Sera ka qënë nën vëzhgimin e prokurorisë prej 5 muajsh, duke verifikuar punën e saj mbi procedurën e mjekimit të kryer ndaj biznesmenit të njohur Donald Shena dhe mënyrën e marrjes së testamentit, veprim ky që është kryer në orët e fundit të jetës së tij.
Për vdekjen e Donald Shena në spital dhe mënyrën e lëshimit të testamentit që u firmosë vetëm me gjurmë gishti, prokuroria e Tiranës në 2018 ka hapur një dosje penale me nr.4327 ku për llogari të hetimit, ka pyetur dy herë edhe pronarin e Spitalit Amerikan, Klodian Allajbeu, i cili ka dhënë sqarime për këtë dosje.
Të njëjtën gjë, prokuroria ka bërë edhe me mjeken onkologe Esmeralda Sera, e cila ka ndjekur mjekimin e biznesmenit të njohur Donald Shena, i cili për shkak të sëmundjes së rëndë, fatkeqësisht ka ndërruar jetë në spital në 25 Maj 2018.
Objekti i hetimit të prokurorisë nuk ka qënë vetëm mjekimi i pakujdesshëm i pacientit, por dhe një testamenti pasuror që sipas prokurorisë mund të jetë marrë në mënyrë jo ligjore, duke u mbështetur nga dokumente të dyshuar si jo të vërteta të lëshuara nga mjekja e Spitalit Amerikan, Esmeralda Sera.
