Ministrja e Arsimit, Evis Kushi, i ka uruar të gjithë fëmijët për festën e 1 Qershorit, me anë të një video-mesazhi të publikuar në rrjetin social “Facebook”.
“Ata meritojnë të gjitha kushtet për të jetuar një fëmijëri të bukur. E ç’kuptim do të kishte puna dhe mundimi ynë nëse në fytyrën e tyre do të mungonte buzëqeshja”, tha fillimisht Kushi.
“Prandaj ne do të punojmë fort që t’i rrisim të shëndetshëm dhe të lumtur, që t’i edukojmë siç duhet, që të jenë profesionistët e aftë dhe qytetarët e denjë të së nesërmes,” përfundoi ministrja.
Në video-mesazh, tërheqin vëmendje mesazhet e Emanuelës nga ‘”nstituti i Nxënësve që nuk Dëgjojnë”, si dhe Anit, nxënësit të talentuar pianist nga “Instituti i Nxënësve që nuk Shikojnë”. Emanuela, në gjuhën e shenjave, përcjell emocione të heshtura dashurie, duke thënë, “Ne jemi si ju!”.
Ndërsa Ani me pjesën e tij të luajtur bukur në piano, shoqëron të gjithë video-mesazhin e urimit për 1 Qershorin. “Zëri arrin aty ku shikimi nuk mundet!” – shprehet pianisti i talentuar.
Fëmijë nga shkolla dhe klasa të ndryshme, në festën e 1 qershorit, shprehin mesazhe kundër dhunës, mesazhe dashurie dhe mbështetjeje për fëmijët që rriten pa prindër, për fëmijët e sëmurë me talasemi dhe leuçemi.
