Ursula von der Leyen, presidentja e Komisionit Europian, ka deklaruar në një intervistë për gazetën “Welt am Sonntag” se Europa ka nevojë për një ‘Plan Marshall’.
Der Leyen u ka bërë thirrje vendeve të BE që të investojnë miliarda në buxhetin e bllokut për të shmangur pasojat katastrofike ekonomike nga kriza aktuale e koronavirusit, teksa sqaron se me “Plan Marshall për Europën” i referohet programit të rimëkëmbjes të vendosur nga SHBA në periudhën 1948-1952 për të ndihmuar ekonomitë e Europës Perëndimore pas Luftës së Dytë Botërore.
Sipas presidentes, buxheti i BE u pranua nga të gjitha shtetet anëtare si një mjet për të nivelizuar pabarazitë në një frymë solidariteti dhe se ai tani duhet të përshtatet për të përballuar krizën.
“Shumë miliarda që duhen investuar sot për të shmangur një katastrofë më të madhe, do t’i lidhin brezat së bashku.”
Më herët, thirrja për një ‘Plan Marshall në BE’ ka ardhur edhe nga kryeministri i Spanjës, Pedro Sanchez, i cili gjithashtu i ka kërkuar Europës që të marrë masa të menjëhershme ekonomike sikur po angazhohet në një luftë.
Por, çfarë është ‘Plani Marshall’?
Programi i ndihmës për rindërtim, njohur gjerësisht me emrin plani “Marshall”, ishte programi më i rëndësishëm amerikan për ringjalljen ekonomike të kontinentit europian pas përfundimit të Luftës së Dytë Botërore.
Programi në fjalë u iniciua nga ish-sekretari amerikan i Shtetit për Punët e Jashtme dhe George C. Marshall, prej të cilit plani mori emrin, dhe u përpunua më pas nga ekspertët e Departamentit të Shtetit, William L. Clayton dhe George F. Kennan.
Për nisjen e vënien në jetë të këtij plani pati tri arsye bazë: ndihma për popujt evropianë në nevojë e pjesërisht të kërcënuar seriozisht nga uria, si pasojë e një lufte, më shkatërrimtarja që njerëzimi kishte përjetuar ndonjëherë, pengimi i zgjerimit të ideve, praktikave e ndikimit sovjetik në kontinent, si dhe arritja e një tregu funksional që do të bënte të mundur shitjen e produkteve të ndërmarrjeve amerikane me mbiprodhim.
Programi zgjati katër vjet dhe shuma e ndihmave ekonomike të lëvruara si pasojë e këtij programi nga SHBA-ja arriti shifrën e rreth 12,4 miliardë dollarëve.
