Mes kryeministrit Edi Rama dhe homologut të tij në ikje, ka nisur një luftë e ftohtë deklaratash.
E gjitha nisi pas darkës së famshme, ku kancelarja Merkel dhe presidenti francez, Macron, po diskutonin në një tavolinë, me liderët e Kosovës dhe Serbisë për taksën.
Këshilltarja e Haradinajt, Melisa Haradinaj Stublla, ka zbuluar disa detaje nga kjo darkë.
Sipas saj, Rama erdhi si i paftuar në tavolinë.
Më tej ajo shton, se kryeministri shqiptar fliste pa rend e respekt ndaj diskutuesve, ndërsa kapte presidentin Hashim Thaçi për krahu.
Këshilltarja e Haradinajt vijon më tej duke thënë, se Rama filloi të bënte gjestikulacione jo serioze, pasi askush nuk po i kushtonte vëmendje.
Postimi i plotë
Domosdoshmëria e zgjidhjes së nyjes Kosovë – Serbi, nuk i jep rol paternalist Edi Ramës që të imponohet si ndërmjetësues. Megjithatë, ai provoi këtë rol edhe në diskutimet informale në Berlin, duke u afruar pa ftesë tek tavolina ku kancelarja Merkel dhe presidenti Macron i ftoi për pije liderët e Kosovës dhe Serbisë.
KM Rama ‘kërcente’ në diskutimet që filluan aty – pa rend e pa respekt ndaj diskutuesve. Dikur filloi të kapte Presidentin Thaçi për krahu, duke tentuar ta tërhiqte më larg kryeministrit Haradinaj, për të gjetur një bashkëbisedues për dokrrat e tij gjeopolitike që si dëgjonte kush.
Dikur kur u bind që Kosova ka lider që zëshëm dhe logjikshëm e argumenton realitetin e Kosovës, dhe atë madje edhe në anglisht edhe në frëngjisht, u spostua në kolltuqet anash hollit të Zyres së Kancelares, duke pozuar para fotoaparatit të Ministrit të tij në detyrë.
Më pas vazhdoi pa ndonjë rol, duke ofsharë nëpër hollet e katit të 5të, e duke bërë gjestikulacione joserioze për një kryeministër për të shfaqur pakënaqësinë e tij për mungesë vëmendjeje, edhe pse me mbathje atraktive.
Në fakt, do të ishte shumë më mirë nëse Rama do preokupohej me rrugën eurointegruese të Shqipërisë, e mos të humbte kohën e mundësinë duke fshehë dështimet e tij qeverisëse prapa këshillave ‘kreative’ që ia jepte Kryeministrit Haradinaj se si të zgjidhej çështja Kosovë – Serbi, apo si të veprohej me taksën 100%.
E vërteta është një, si privatisht, ashtu edhe publikisht: që Kosova nuk është mall as tokë që mund të shkëmbehet nga tregtarë aksidental! Veprimet specifike të shqiptarëve që i përgjigjen agjendës serbe, do të kenë kualifikim të veçantë në historinë kombëtare… e kjo s’është punë e kësaj gjenerate! Ma thuani cilit shqiptar i duhet ‘e vërteta’ e Ramës me dëshmitar Vuqiqin e Thaçin?!
Kujtojmë këtu se kreyministri Rama, deklaroi se do ta padisë Haradinajmn për shpifje, pas akuzave se do të ndaj Kosovën me Thaçin e Vuçiç, për 10 miliardë euro.
Njëkohësisht shefi i qeverisë shqiptare mohoi se i ka bërë presion Haradinajt, për taksën ndaj Serbisë.
