Çfarë po ndodh në sektorin e energjisë? Dorëheqje, largime nga puna për arsye familjare apo procese nën hetim nga SPAK? Ende mbeten të pazbardhura pse, por në dy ditët e fundit kemi dy dorëheqje nga KESH dhe OSHEE.
Kështu drejtori i Përgjithshëm i Koorporatës Eleketroenergjetike Shqiptare, Ergys Verdho, është larguar nga posti i tij, duke dhënë dorëheqjen për motive që ende nuk janë zbardhur.
Sa u shit energjia më 1 dhe 2 prill? Drejtori i KESh jep një shifër më të lartë se dokumentet e tenderit
Ergys Verdho u emërua si drejtor i KESH në qershor të vitit 2021. Gjatë kohës që ishte në krye të Koorporatës, vendi u përball me situatën e jashtëzakonshme energjetike si pasojë e krizës që imponoi lufta në Ukrainë.
Por nuk është ky largimi i vetëm nga sektori i energjisë. Pas drejtorit të KESH, mësohet se ka dhënë dorëheqjen edhe kreu i FSHU-së, Elton Sevrani.
Vetëm pak ditë më parë në media u publikua lajmi se SPAK ka shkuar në zyrat e OSHEE për një hetim që ka lidhje me fshirjen e debive të bizneseve dhe qytetarëve për fatura të papaguara energjie kundrejt rryshfetit. SPAK ka sekuestruar telefonin e zotit Sevrani si një nga personat nën hetim për këtë çështje.
Elton Sevrani ka një karrierë të gjatë pranë Operatorit të Shpërndarjes së Energjisë Elektrike duke mbajtur poste të rëndësishme në krye të departamenteve kyçe pranë kësaj kompanie.
Me ndarjen e OSHEE në disa kompani ai u emërua në krye të Furnizuesit të Shërbimit Universal./VoxNews
