Një vatër e fuqishme zjarri ka përfshirë zonën bregdetare të Palaia Fokaias, rreth 40 kilometra në jug të Athinës, duke kërcënuar banesat dhe duke detyruar autoritetet të urdhërojnë evakuimin e katër vendbanimeve përreth.
Flakët janë përhapur me shpejtësi për shkak të erërave të forta dhe temperaturave ekstreme, që sot në disa zona të Greqisë kanë kapur 38°C.
Në operacionin e shuarjes janë angazhuar mbi 90 zjarrfikës, të mbështetur nga tetë avionë dhe pesë helikopterë, ndërsa përmasat e dëmeve mbeten ende të paqarta. Disa banesa janë përfshirë nga zjarri, por autoritetet ende nuk kanë dhënë një bilanc të saktë. Pamjet televizive treguan helikopterë që hidhin ujë mbi zonat e prekura dhe shtëllunga tymi që mbulonin qiellin përreth.
Greqia prej vitesh përballet me pasoja të rënda nga moti ekstrem, përfshirë zjarret dhe përmbytjet, të cilat, sipas ekspertëve, janë bërë gjithnjë e më të shpeshta dhe intensive për shkak të ndryshimeve klimatike. Për të përballuar sfidat e verës, qeveria greke ka investuar ndjeshëm në pajisje dhe forca zjarrfikëse, duke e çuar numrin e zjarrfikësve në 18 mijë këtë vit – një rekord për vendin.
Autoritetet janë në gatishmëri të lartë, teksa vera sapo ka nisur dhe parashikimet flasin për një sezon me rrezik të shtuar nga zjarret.
