Një zjarr ka përfshirë pasditen e sotme një zonë me shkurre dhe ferra në lagjen “30 Vjetori” të qytetit të Beratit, pranë godinës së Drejtorisë së Bujqësisë.
Menjëherë pas njoftimit, shërbimet zjarrfikëse ndërhynë në vendngjarje me dy mjete dhe një grup operativ, duke arritur që brenda pak minutash të vënë flakët nën kontroll.
Fatmirësisht, zjarri nuk ka shkaktuar dëme materiale apo të lënduar.
Sipas burimeve nga zjarrfikësja, dyshohet se zjarri është shkaktuar qëllimisht. Duke qenë shumë pranë zonës së banuar, ekzistonte rreziku i përhapjes, për shkak edhe të temperaturave të larta që kanë favorizuar përflakjen e shpejtë të bimësisë së thatë.
Në vendngjarje janë thirrur edhe shërbimet e policisë, të cilat po punojnë për identifikimin e autorëve dhe shkaqeve të plota të ngjarjes.
Ndërkohë, MZSH bën apel për kujdes të shtuar në këto ditë të nxehta për të shmangur zjarrvëniet dhe rrezikun ndaj komunitetit.
