Pas tërmetit të 26 nëntorit, qeveria ka nisur punën për të rikuperuar dëmet.
Kryeministri Edi Rama gjatë këtyre ditëve, ka bërë disa propozime për programin e rindërtimit.
Së fundmi shefi i qeverisë i ka propozuar presidentit Ilir Meta, që të emërojë si ministër të Shtetit për Rindërtim, ish-Ministrin e Financave, Arben Ahmetaj.
Nëpërmjet një postimi në Twitter, Rama shkruan se programi i rindërtimit, kërkon hapjen e një vendi të posaçëm në tryezën e Këshillit të Ministrave, ku një ministër të merret me koordinimin e institucioneve vendase dhe ndërkombëtare, si dhe të mbikëqyrë zbatimin e programit.
“Programi i Rindërtimit dikton hapjen e një vendi të posaçëm edhe në tryezën e Këshillit të Ministrave,ku një ministër i ngarkuar ekskluzivisht me koordinimin e të gjitha institucioneve vendase e ndërkombëtare që lidhen me këtë program,të ndjekë orë e minutë zbatimin e Programit”, shkruan Rama.
Presidenca ka reaguar menjëherë nëpërmjet zëdhënësit, Tedi Blushi, i cili është shprehur, se presidenti nuk do të vonohet asnjë sekond për dekretimin e Ahmetajt.
“Asnjë sekondë vonesë për dekretimin e ministrit të ri të Shtetit për Rindërtimin”, shkruan Blushi.
