Vetëm pak ditë pasi Portugalia ka marrë presidencën e Bashkimit Evropian, janë zbardhur edhe prioritetet e saj, ku bie në sy se nuk ka referencë për zgjerimin e BE-së, ndonëse shumë vende janë në pragun e negociatave, përfshirë edhe Shqipërinë.
Kryenegociatori i Shqipërisë, Zef Mazi, shprehet optimist se pavarësisht se zgjerimi nuk përmendet, strategjia e BE nuk ka ndryshuar dhe nuk do të ndryshojë dhe kjo sipas tij nuk sjellë asnjë shqetësim për vendin tonë.
Gjithsesi ai i ka kërkuar BE që të tregohet më e qartë me strategjinë e zgjerimin në mënyrë që të mos penalizohen vendet kandidate që janë shumë afër pranimit. “Unë jam optimist, megjithë interpretimet e ndryshme, se strategjia nuk ka ndryshuar dhe nuk do të ndryshojë.
Tani për tani mund të shohim përpjekje apo ndonjë pozicionim jo të favorshëm, për t’i shtyrë në kohë disa gjëra, por jo për t’i pezulluar. Jemi vetëm në ditën e katërt të një viti të gjatë, të vështirë, ku operojnë dy presidenca të Këshillit.
Koha, ecuria e punëve do tregojë më shumë e më qartë. Ndonjë mund të fshihet pas këtij listimi prioritetesh, të ketë qenë ose të jetë dakord. Unë nuk besoj që ky është qëndrim inteligjent.
Nëse është kështu, kjo paqartësi nuk mund të mbahet gjatë. BE, Këshilli, Komisioni Evropian dhe shtete anëtare, do duhet të prononcohen qartë nëse ka ndryshuar ose jo strategjia e zgjerimit të BE që është vendosur nga Këshilli zyrtarisht sa e sa vite më parë në mbledhje të nivelit të lart”, deklaroi ai.
Sipas tij, fakti që zgjerimi i BE nuk është vendosur në listë nuk jep sinjale që strategji ka ndryshuar dhe nuk ka pse të ndryshohu kur Shqipëria dhe vende të tjera e kaun bërë gjysmën e rrugës.
“Kjo mospërmendje e zgjerimit të BE-së ndër prioritetet e presidencës portugeze nuk erdhi si surprizë. Analizuar nga afër, teksti i prioriteteve, aq sa mund të deduktohet sot për sot, për presidencën portugeze kanë më shumë rëndësi fqinjët në Afrikë dhe Amerikën Latine sesa përfshirja në BE, domethënë zgjerimi i BE. Nuk kam dëgjuar deri tani që ka ndryshuar strategjia e BE për zgjerimin! Nuk e besoj se ka ndryshuar! Presidenca portugeze mund të thotë më shumë për ketë”, deklaroi Mazi në një intervistë televizive./Gazetareforma.com/
