Ditën e sotme janë zhvilluar zgjedhjet në 4 komuna në veri të Kosovës.
Lëvizja Vetëvendosje ka shpallur fitoren në Leposaviq dhe në Mitrovicë të Veriut, në zgjedhjet lokale të mbajtura të dielën në veri të Kosovës. Dy komunat tjera, Zveçanin dhe Zubin-Potokun mësohet se i kanë fituar kandidatët e Partisë Demokratike të Kosovës.
Deputeti i VV-së, Armend Muja, ka thënë se kandidati i kësaj partie në Mitrovicë të Veriut, Erden Atiq, ka marrë mbi 65 për qind të votave. Sipas tij, në Leposaviq kandidati i VV-së, Lulzim Hetemi ka marrë mbi 70 për qind të votave.
Ndërsa sipas burimeve të KOHËS, dy komunat tjera Zveçani dhe Zubin-Potoku janë fituar nga kandidatët e Partisë Demokratike të Kosovës. Sipas burimeve, në Zubin-Potok, Izmir Zeqiri i PDK-së ka marrë 196 vota, ndërsa Flatron Hasani i VV-së 180. Në Zveçan 114 vota i ka fituar Ilir Peci i PDK-së ndërsa Fetah Peci i VV-së 73 vota.
Vetëm 3.47 për qind e 45 mijë e 95 qytetarëve me të drejtë vote në katër komunat e veriut të Kosovës kanë shfrytëzuar të drejtën e tyre për votë të dielën në zgjedhjet e jashtëzakonshme në Leposaviq, Zubin-Potok, Zveçan e Mitrovicë të Veriut. Sipas të dhënave zyrtare të Komisionit Qendror të Zgjedhjeve në Mitrovicën e Veriut votuan 837 qytetarë apo 4.62 për qind e qytetarëve me të drejtë vote. Në Leposaviq votuan 141 votues apo 1.06 për qind, në Zubin-Potok 385 votues apo 5.78 për qind dhe në Zveçan 204 qytetarë apo 2.92 për qind e qytetarëve me të drejtë vote.
