Komisioni Qendror i Zgjedhjeve në Kosovë ka njoftuar ditën e sotm masat të cilat duhet të zbatojnë qytetarët në ditën e zgjedhjeve më 14 shkurt.
KQZ ka bërë thirrje që të respektohen masat anti-COVID, ndërkaq thekson se duhet të mbahet distanca fizike në momentin që qytetarët janë në vendvotime. Pasi numri i të infektuarve dhe viktimave nga Covid-19 po vijon të rritet çdo ditë e më shumë.
Njoftimi i plotë:
KQZ njofton të gjithë qytetarët me të drejtë vote për masat që duhet t’i zbatoni në ditën e zgjedhjeve. Për të votuar duhet të mbani maskë mbrojtëse duke mbuluar hundën dhe gojën; Mbani distancë fizike 2 metra derisa prisni në radhë për të hyrë në qendër të votimit dhe në vendvotim;
Gjatë hyrjes në vendvotim dezinfektoni duart; Pas dezinfektimit të duarve, prezantoni dokumentin e identifikimit dhe hiqni maskën mbrojtëse me qëllim që të identifikoheni nga anëtari i vendvotimit;
Pas identifikimit, rivendoseni maskën; Pas kësaj ju duhet të merrni fletëvotimin dhe të hyni në kabinën e votimit për të votuar dhe në fund vendoseni fletëvotimin në kutinë e votimit;
Në dalje të vendvotimit ju duhet t’i dezinfektoni serish duart. Komisioni Qendror i Zgjedhjeve kërkon mirëkuptimin e qytetarëve për zbatimin e këtyre masave të domosdoshme me qëllim të mbrojtjes së shëndetit.
