Qeveria ka vendosur të shtyjë afatin e vlefshmërisë për dokumentet e identitetit që skadojnë deri më 11 maj 2025, për të garantuar pjesëmarrjen e qytetarëve në zgjedhjet parlamentare.
Vendimi u miratua këtë të mërkurë në mbledhjen e Këshillit të Ministrave dhe synon të shmangë çdo pengesë për votuesit me letërnjoftime apo pasaporta biometrike të skaduara ose që do të skadojnë para zgjedhjeve.
Ministri i Brendshëm, Ervin Hoxha, deklaroi se të gjitha dokumentet e kësaj kategorie do të konsiderohen të vlefshme deri më 31 maj 2025. Ai sqaroi se vendimi bazohet në analizat që tregojnë një numër të madh shtetasish me dokumente të pavlefshme, përfshirë edhe ata që jetojnë jashtë vendit.
Sipas tij, janë marrë masa për të garantuar mbarëvajtjen e procesit zgjedhor, përfshirë angazhimin e Policisë së Shtetit në shërbim të përforcuar.
Kujtojmë se KQZ kishte kërkuar zgjidhje për këtë çështje që në janar, duke theksuar vështirësitë që has diaspora për të votuar për shkak të dokumenteve të skaduara. Në vijim, në shkurt 2025 u miratuan aktet normative që parashikonin shtyrjen e afateve për shqiptarët jashtë vendit.
