Ditët e fundit ka pasur zhvillime në hetimet ndaj grabitjes së parave në aeroportin e Rinasit. Policia ka ndërtuar skemën se si funksiononte banda që theu sigurinë e rinasit duke vjedhur 7 thasë me para, ditën e 9 prillit.
Veç Admir Muratajt, i vrarë gjatë grabitjes nga Policia, si i përfshirë dyshohet edhe Klement Çala, i cili më herët ka mundur t’i shpëtojë dhe drejtësisë shqiptare dhe pse rezultonte në kërkim ndërkombëtar. Çala ishte shpallur në kërkim nga autoritet greke, pasi është një nga personat i cili u arratis nga burgu i Trikalasë në vitin 2013 së bashku me Admir Muratajn.
Por, në vitin 2015 Klement Çala u arrestua nga policia shqiptare në qytetin e Vlorës, ku së bashku me të ndodhej dhe një nga katër të arrestuarit për grabitjen në Rinas, Alkond Bengasi. Në atë kohë, sipas vendimit të gjykatës, policia ishte në kërkim të Bengasit i cili ishte dënuar nga gjykata për përdorim dhe shitje të lëndëve narkotike.
Por në mënyrë të çuditshme jo vetëm Bengasi por edhe Klement Çala i shpëtoi qelisë edhe pse ai kërkohej nga autoritetet greke si i arratisur nga burgu i Trikallas.
Ndërkohë edhe Saimir Çela është një person me precedent të mëparshëm penal. Mësohet se Saimir Çela ka qenë shoqëruar edhe për grabitjen e pikës së Këmbimit Valutor në Fier, ku mbeti i vrarë Agur Vrenozi pas përleshjes me grabitësit, por ai u lirua sërish pasi policia nuk gjeti prova për ta lidhur me tre autorët Zini Fyraj, Lulëzim Demiraj dhe Dashamir Gergali.
Ndërsa për Renaldo Sulajn nuk ka dosje hetimore, ndërkohë që policia nuk jep detaje për rolin e tij në këtë grabitje, ndërsa të dy këta persona njihen si të afërm të Klement Çalës madje edhe me lidhje farefisnore.
Edhe Oltjon Veseli i arrestuar në Krujë, nuk duket se ka lidhje fare rastësore me këtë grabitje apo me sulmet që u janë bërë blindave me para në të shkuarën. Oltjon Veseli është i afërm i Dash Kupës, grabitësit të blindave me para në 2015. Madje familjarë të tij dhe Dash Kupa janë ortak në biznese shërbimi si restorante apo piceri.
