Dy nga policët e lënduar mbrëmë nga aksidenti me automjetin zyrtar të blinduar në Zveçan po trajtohen në Kirurgjinë Torakale dhe atë të Klinikës së Ortopedisë me Traumatologji, pranë Qendrës Klinike Universitare të Kosovës (QKUK).
Mjeku kujdestar i Kirurgjisë Torakale, Frederik Çuperja, deklaroi se pacienti ka pësuar thyerje të shumëfishta të brinjëve dhe ndrydhje të kraharorit, por gjendja e tij është aktualisht stabile.
Ai shtoi se polici, i moshës rreth të tridhjetave, do të vazhdojë të trajtohet në Kirurgjinë Torakale për një periudhë të mëtejshme.
“Gjendja e pacientit është stabile, mirëpo lëndimet mjaftë të rënda. Kemi të bëjmë me ndrydhje të kraharorit dhe thyerje shumëfish të brinjëve. Për fat të mirë nuk po shihen për momentin lëndime të tjera. Por, është ajo procedura e nevojshme që të përcjellët pacienti që të shohim që në të ardhmen a do të paraqitët ndonjë problem apo jo. Aktualisht çdo gjë po shkon në rregull. Besoj që shumë shpejtë do ta lëshojmë edhe në shtëpi…A mund të themi se është jashtë rrezikut për jetë? Për momentin po, por është e nevojshme që tek çdo lëndim të kalojnë së paku dy ditë që të themi me një siguri pak më të madhe se a di të ndodhë diçka apo jo. Ky është një djalë i ri, i fuqishëm, thyerja e brinjëve lidhet me paaftësi të përkohshme sa i duhet për rehabilitim, mirëpo besoj që nuk do të ketë probleme dhe pasoja. Pacienti është në të tridhjetat nëse nuk gabohem”, tha Çuperja.
Ndërkohë, shefi i ekipit kujdestar në Klinikën e Ortopedisë me Traumatologji, Ermir Shabani tha se njëri nga policët i është nënshtruar një operacioni dhe i është vendosur një pllakë në pjesën afër gjurit.
“Mbrëmë rreth orës 22;00 ose 22:30 është pranuar një polic rreth moshë 27 vjeçare pas aksidentit të pësuar në Zveçan, me ç’rast polici në fjalë ka thyerje të kërcirit, frakturë e hapur, e gradës së parë ku menjëherë pas përgatitjes pro operatore është bërë intervenini operativ. Është stabilizuar thyerja me vendosje të pllakës. Momentalisht gjendja e policit është stabile…Kërciri i bie pjesa e poshtë e këmbës, e cila ka qenë e thyer dhe është vendosur pllakë. Operacioni është kryer dje në orët e vona nga ekipi kujdestar që ka qenë në Klinikën e Ortopedisë. Pacienti është jashtë rrezikut për jetë dhe gjendja e tij është stabile. Pritet të lirohet nga spitali pas javës së ardhshme pas një jave apo dhjetë ditëve”, potencoi Shabani.
