Kryeministri i Maqedonisë së Veriut, Zoran Zaev ka thënë se vendi i tij dhe Shqipëria duhet të mos ndahen në procesin e antarësimit në Bashkimin Europian. Pas një takimi në Bruksel me presidenten e Komisionit Evropian, Ursula von der Leyen, Zaev tha se do të ishte në interesin e Shqipërisë që dy vendet të shkojnë së bashku.
“Është në interesin tonë të ecim së bashku. Interesi i Shqipërisë është të shkojmë së bashku, të ndihmojmë njëri-tjetrin së bashku gjatë gjithë këtij procesi… Ne e meritojmë nisjen e bisedimeve si askush tjetër. Gjashtëmbëdhjetë vjet jemi me statusin e shtetit kandidat, tre vjet pas Marrëveshjes së Prespës, njëqind ditë pas reformave të përfunduara. Këto, në vitin 2020, u konfirmuan plotësisht nga 27 vendet anëtare të Unionit. Ne vazhdojmë të forcojmë shtetin e së drejtës, e shohim atë çdo ditë në luftën kundër krimit dhe korrupsionit, e cila nuk është e lehtë për asnjë qeveri në botë, nuk është as për ne, por është e ardhmja evropiane”, tha Zaev.
Von der Leyen nga ana tjetër tha se do të angazhohet që Shqipëria dhe Maqedonia e Veriut t’i fillojnë bashkë negociatat dhe pa shtyrje të mëtejshme.
“KE-ja do të thellojë edhe më shumë angazhimin dhe përkushtimin thelbësor, sepse ky është proces shumë i rëndësishëm që nuk guxon ta shtyjë fillimin e negociatave për anëtarësim me Maqedoninë e Veriut. Angazhohem që dy shtetet, Maqedonia e Veriut dhe Shqipëria bashkërisht t’i fillojnë negociatat, pa shtyrje të mëtejshme,” theksoi Von der Leyen.
