Dëshmia e motrave Hasaj mbi vrasjen e Ramazan Matajt ka shkaktuar debat mes familjeve të përfshira, me pretendime të kundërta për rrethanat e ngjarjes.
Armela Hasaj, motra e Arjon dhe Klisman Hasajt, të arrestuar për këtë vrasje në janar, ka deklaruar se viktima i kishte kërcënuar dhe shantazhuar për një kohë të gjatë.
Ajo pretendon se Mataj i dërgonte foto me armë pranë shtëpisë së saj, duke e detyruar të mbante kontakte me të.
Sipas saj, edhe motrat e tjera kishin qenë viktima të këtyre presioneve.
Një tjetër motër e familjes Hasaj ka mbështetur këtë version, duke pohuar se Mataj u dërgonte mesazhe dhe video kërcënuese.
Nga ana tjetër, babai i Ramazan Matajt ka mohuar kategorikisht këto akuza, duke i cilësuar si një përpjekje për të justifikuar vrasjen dhe për të shpëtuar vëllezërit Hasaj nga drejtësia.
“E kam përjetuar shumë keq intervistën e Armela Hasajt. Ku ishin ato katër vite më parë? Pse nuk kanë folur më parë për këtë? Djali im nuk kishte asnjë lidhje me këto pretendime. Nuk ka si të jetë e vërtetë që Ramazani u ka dërguar foto apo video kërcënuese. Datat që përmendin ato nuk përputhen, pasi në atë kohë djali im punonte në Malin e Zi. Kam dyshime se e kanë vrarë me lekë, u shpreh ai.
Hetimet për këtë ngjarje vijojnë, ndërsa autoritetet po shqyrtojnë të gjitha dëshmitë për të zbardhur të vërtetën e konfliktit.
