Në protestën e organizuar nga opozita dhe AMT, Bëlind Këlliçi, anëtar i kryesisë së Partisë Demokratike, ka bërë thirrje të fuqishme ndaj policisë për arrestimin e kryebashkiakut të Tiranës, Erion Veliaj. Këlliçi akuzoi Veliajn për vjedhje dhe keqpërdorim të detyrës.
Gjatë fjalës së tij në protestë, Këlliçi u shpreh: “Ndaloni dhunën ndaj qytetarëve dhe arrestoni hajdutët në bashki. I nderuar drejtues i Policisë së Shtetit që po flet me mikrofon, merr masa që të arrestosh një hajdut që ka vjedhur 30 milionë euro nga taksat tuaja.”
Ai vuri në dukje se policia është përdorur për interesa personale të Veliajt, duke thënë: “Të nderuar efektivë të Policisë së Shtetit, jeni dëshmitarë se si jeni përdorur ndër vite për t’i shërbyer biznesit personal të pronarit faktik të inceneratorit të Tiranës, Erion Veliaj.”
Këlliçi gjithashtu denoncoi mbylljen e bashkisë për këshilltarët bashkiakë të opozitës, duke e cilësuar këtë si një veprim antidemokratik. “Ku keni parë ju një bashki tjetër në botë që nuk lejon këshilltarët bashkiakë të futen në institucion për të marrë informacion?” pyeti ai.
Në fund të fjalës së tij, Këlliçi i bëri thirrje SPAK-ut që të veprojë bazuar në provat e paraqitura. “I bëj thirrje SPAK-ut me të gjithë dokumentet që kemi dorëzuar deri tani, me të gjithë materialet dhe provat e pakundërshtueshme që provojnë përfshirjen e drejtpërdrejtë të Erion Veliajt në aferën e inceneratorit të Tiranës, të zbatojë ligjin dhe të çojë para drejtësisë pronarin faktik të inceneratorit të Tiranës, Erion Veliaj.”
Protesta vijon të jetë një pikë kyçe për të kërkuar transparencë dhe përgjegjësi nga zyrtarët e lartë të qytetit.
