Gazetarja Klodiana Lala, e ftuar në emisionin *Open*, ka ndarë detaje të reja lidhur me vrasjen e 14-vjeçarit Martin Cani, ngjarje që ndodhi pranë shkollës “Fan Noli” në Tiranë.
Sipas Lalës, rezulton se përleshja ka ndodhur mes dy grupe fëmijësh.
Ajo sqaroi se si viktima, ashtu edhe autori i dyshuar i krimit, kanë qenë të shoqëruar nga bashkëmoshatarë.
Gjithashtu, gazetarja bëri me dije se njëri prej shokëve të autorit të dyshuar është djali i një hetuesi të SPAK.
Lala shtoi se deri më tani hetimet kanë arritur në përfundimin se ngjarja është kryer nga një person i vetëm, ndërsa pritet që akt-ekspertiza të zbardhë detajet përfundimtare.
Klodiana Lala: Çdo prind duhet t’i bashkohet protestës. Pas vrasjes së Martin Canit, po mbahen nën vëzhgim ambientet e jashtme të shkollave. Fatkeqësisht, që të bëhej kjo, duhet të ndërronte jetë një 14-vjeçar. Mendoj se reagimi është me vonesë. Ka çdo ditë konflikte në shkolla, situata është alarmante. Protesta për vrasjen e adoleshentit nuk duhet të jetë me ngjyrime politike. Nëse një mësues del te protesta, të nesërmen nuk është më në punë. Mësuesit frikësohen të dalin në protestë.
Në ngjarje kanë qenë 5 persona. Martin Cani, ka qenë me Luizin dhe me djalin e tezes. Vrasësi i dyshuar ka qenë me një mikun e tij, që nuk është ndaluar nga policia, pasi rezulton se nuk është përfshirë në ngjarje. Janë përleshur dy grupet e fëmijëve. Shoku i autorit të dyshuar rezulton se është djali i një hetuesi të BKH, pranë Prokurorisë së Posaçme. Grupi i hetimit ka dalë në përfundimin se nuk ka pasur autor të dytë në ngjarje. Por çështja po hetohet. Me akt-ekspertimin do arrihet në përfundimin sesa thika janë përdorur në ngjarje. Akt-ekspertimi zbardh ngjarjen.
