Regjistrimi i shqiptarëve jashtë vendit për të marrë pjesë në zgjedhjet parlamentare të 11 majit përfundoi të martën, me 234 mijë votues të regjistruar.
Ky proces, i cili po zhvillohet për herë të parë, tejkaloi pritshmëritë fillestare, por mbetet i kufizuar, duke përfshirë vetëm 15-20% të emigrantëve shqiptarë me të drejtë vote.
Sipas ekspertëve zgjedhorë, vota e emigrantëve do të ndikojë ndjeshëm në rezultatin e zgjedhjeve, veçanërisht në qarqet ku diferenca mes mandateve është e vogël.
Kristaq Kume, drejtues i Institutit për Zhvillimin e Sistemeve Zgjedhore, thekson se shpërndarja e mandateve në disa qarqe mund të ndryshojë edhe me një diferencë prej 50-100 votash.
Një studim i Koalicionit për Reforma, Integrim dhe Institucione të Konsoliduara (KRIIK) parashikon se votat nga diaspora do të ndikojnë në rreth 19-20 mandate në të 12 qarqet e vendit.
Sipas këtij studimi, Tirana pritet të ndikohet më së shumti me 4 mandate, Fieri me 3, ndërsa Durrësi, Elbasani, Vlora dhe Shkodra me nga 2. Qarqet e tjera, si Berati, Korça, Gjirokastra dhe Lezha, do të ndihen me nga 1 mandat, ndërsa ndikimi në Dibër dhe Kukës pritet të jetë i papërfillshëm.
Ekspertët sugjerojnë se pjesëmarrja e emigrantëve në zgjedhje do të ishte më e lartë nëse partitë politike do të përfshinin figura të njohura nga diaspora në listat e tyre.
Në këtë mënyrë, ata do të ndiheshin më të përfaqësuar dhe më të motivuar për të marrë pjesë në votim.
Kristaq Kume thekson se një faktor kyç do të jetë vendosja e kandidatëve nga diaspora në pjesën e sipërme të listave, ku mundësitë për t’u zgjedhur janë më të mëdha.
“Unë do të isha më i prirur të votoja një kandidat bashkëqytetar emigrant sesa dikë që jeton në Shqipëri,” shprehet ai.
Një tjetër sugjerim është krijimi i një grupi parlamentar të dedikuar për diasporën, për të garantuar që zëri i emigrantëve të dëgjohet në Kuvendin e Shqipërisë.
KRIIK ka theksuar se idealja do të ishte një përfaqësim i dedikuar për emigrantët, me deputetë të zgjedhur posaçërisht prej tyre.
Tashmë, vëmendja është e përqendruar tek listat e kandidatëve që partitë politike do të dorëzojnë deri më 12 mars. Ekspertët besojnë se ato parti që do të angazhojnë më shumë kandidatë nga diaspora do të jenë më të favorizuara për të marrë votën e emigrantëve.
Megjithatë, mbetet për t’u parë se sa seriozisht partitë do ta trajtojnë këtë aspekt dhe nëse diaspora do të arrijë të ketë një ndikim të strukturuar në politikën shqiptare./Voa
