Porti i Vlorës po përballet me fluks të shtuar emigrantësh dhe turistësh në prag të festave të fundvitit, ndërsa moti i keq dhe kontrollet intensive kanë shkaktuar vonesa të ndjeshme.
Mbrëmjen e së dielës, zbarkimi i 164 makinave nga një traget u vonua për më shumë se tre orë, për shkak të kontrolleve të imtësishme nga Drejtoria e Kufirit.
Po ashtu, nisja e tragetit drejt Italisë u vonua, si pasojë e vonesave në zbarkim, kontrolleve të mjeteve dhe procesit të hipjes së pasagjerëve dhe automjeteve.
Përveç fluksit të lartë, kushtet atmosferike me shi dhe erë të fortë kanë ndikuar në oraret, duke bllokuar përkohësisht disa linja detare me Italinë.
Autoritetet portuale të Vlorës nuk kanë dhënë ende një deklaratë zyrtare për shkaqet e kontrolleve apo për masat që do të merren për të përmirësuar menaxhimin e situatës.
