Basha ka marrë vilë 500 mijë euro në Palasë? Kreu i PD-së mohon , por zëvendëskryeministri Erjon Braçe jep një njoftim të detajuar. “Për ty që shkove bleve një shtëpi 500,000 mijë euro atje”, deklaron Braçe, duke përforcuar akuzën e kryebashkiakut Erion Veliaj, se Basha ka marrë dy vila në kompleksin luksoz Vala Mar. Vetë Basha reagoi dje duke mohuar akuzat, ndërsa tha se do t’i dërgojë në SPAK.
Postimi i Braçes:
“…Palasa u fik si për ty që shkove e bleve një shtepi 500,000 euro atje, ashtu dhe për ty tjetrin që le lekët e vitit atje duke parë shkëmb, asfalt, zall e ujë, patjetër edhe cantësqetullat;
Ne Lalëz ke frikë të shkosh se të del përpara kapaku i pusetës dixhitale që mezi mbylle dhe frika shtohet nga tifozët e dehur të Selltikut;
Ndërkohë, Divjaka është e hapur, me ajër pafund të pastër…”, shkruan ndër të tjera Braçe duke thumbuar Bashën dhe Metën.
Lulzim Basha duke reaguar pas akuzave të zv.kryeministrit Braçe, i quajti deklaratat “fushatë për baltosjen e tij” dhe paralajmëroi se do të bëjë padi penale dhe për Braçen, për shpifje.
“Këta s’kanë përgjigje për këtë plan (i referohet planit me 5 pika të PD) dhe për të justifikuar paratë që do shkonin për familjet që s’kanë të ardhura, shpifin. Erionin (i referohet Veliajt) e kam çuar për shpifje për ndjekje penale. Por meqë është dhe ky i dyti, do e çoj dhe këtë për ndjekje penale për shpifje”, tha Basha në një intervistë televizive.
Ai tha se ka deklaruar pasurinë që në vitin 2005 dhe çdo gjë është publike, ndaj ftoi kryeministrin Rama që t’i hetojë pasuritë e tij sepse policinë dhe prokurorinë e ka vetë.
“Pasuria ime është e deklaruar që në vitin 2005. E gjitha është një fushatë që ka për qëllim baltosjen time për të më penguar në mbrojtjen e interesit të qytetarëve. Të ardhurat e mia dhe pasuria ime kanë qenë të deklaruara që në vitin 2005. Kanë polici e prokurori, aty i kanë le t’i hetojnë”, deklaroi Basha.
