Tensionet në Los Angeles kanë çuar në arrestimin e 49 personave brenda 24 orëve të fundit, ndërsa qyteti ndodhet nën shtetrrethim të përditshëm, nga ora 20:00 deri në 06:00, për të frenuar trazirat dhe veprimet e dhunshme.
Incidentet ndodhën gjatë natës së tretë të shtetrrethimit, teksa policia ndërhyri për të shpërndarë turma protestuesish në qendër të qytetit.
Sipas njoftimit zyrtar të Policisë së Los Angeles, shumica e arrestimeve ishin për refuzim për t’u shpërndarë pas shpalljes së tubimit si të paligjshëm (33 raste), ndërsa 13 persona u ndaluan për shkelje të orës policore.
Një tjetër u arrestua për rezistencë ndaj një oficeri, ndërsa një person u ndalua pasi kishte drejtuar një lazer ndaj një aeroplani, një akt i konsideruar tepër i rrezikshëm për sigurinë ajrore.
Një tjetër u kap për vjedhje, pasi fillimisht ishte ndaluar për shkelje të orës policore.
Për të kontrolluar turmat, forcat policore përdorën mjete më pak vdekjeprurëse, si pjesë e protokollit për ruajtjen e rendit publik.
Ndërkohë, kryetarja e Bashkisë së Los Angeles, Karen Bass, ka reaguar në rrjetin social X, duke mbështetur vendosjen e shtetrrethimit si një masë të domosdoshme për të ndaluar individët që “po shfrytëzojnë situatën për qëllime të dhunshme” dhe theksoi se kushdo që shkel këtë masë do të përballet me ndjekje penale.
