Vijon saga e lumenjve të ndotur, të pushtuar nga mbetjet e inertet, teksa askush nuk shqetësohet për katastrofën që po i bëhet natyrës apo për jetën e banorëve që rrezikohet nga ndotja.
Së fundmi, Genc Sejko ka publikuar në rrjetet sociale disa pamje të trishta nga veriu i Shqipërisë, konkretisht nga lumi Fan i Madh, i cili është kthyer në ngjyrë të zezë për shkak të ndotjes.
Fabrika e bakrit në këtë zonë i është dhënë me koncension një kompanie turke “BER-ONER”, e cila në vend që të përpunojë të gjitha mbetjet e metalit ka gjetur një rrugë më të shkurtër, duke derdhur lëndët e mbetura pa përpunuar në lumin Fan i Madh.
“Fabrika e bakrit në Fushë-Arrez, e cila është marrë me konçesion nga një kompani turke ka dalë me një ide gjeniale. Për të kursyer lekë, mbetjet që dalin nga përpunimi i bakrit i hedh direkte në lumin Fan i Madh. Pse mos ta bëjë kush do t’i ndalojë?!,”-shkruan Sejko.
Për më tepër lumi përdoret për të vaditur mbi 700 ha tokë, duke bërë që gjithë sterilet e bakrit të derdhen në të mbjella.
Banorët ankohen prej vitesh për ndotjen e lumit, duke u shqetësuar edhe për faktin se i njëjti ujë përdoret edhe në shtëpitë e tyre, por nuk kanë marrë kurrë një përgjigje.
Kjo problematikë shumë shqetësuese paraqitet kudo në vendin tonë, por pavarësisht se mediat dhe njerëzit e prekur kanë ngritur alarmin, institucionet vazhdojnë të heshtin.
Më herët ditën e sotme, pasqyruam të njëjtën panoramë nga zona e ish-Fushës së Aviacionit, ku mbetjet kanë pushtuar lumin e Tiranës dhe pamjet e përcjella prej andej paraqisin një situatë është dramatike.
