Inspektorati i Lartë i Drejtësisë ka dërguar ditën e sotme një ekip të posaçëm në lidhje me rastin e magjistrates Enkeleda Kapedani, pas publikimit të videove nga vetë ajo në “Tik-Tok”.
Mësohet se grupi i ILD-së do të fotografojë zyrën dhe ambientet e Gjykatës, për të verifikuar nëse videot e gjyqtares janë bërë në këto ambiente .
Ky rast ka bërë shumë bujë dhe ka ngjallur reagime, më herët Inspektori i Lartë i Drejtësisë, Artur Metani ka urdhëruar edhe nisjen e hetimit disiplinor ndaj magjistrates për rastin. Në një deklaratë për mediat edhe ministrja e Drejtësisë Etilda Gjonaj e cilësoi si të “pakomentueshëme”, videot në Tik Tok të Kryetares së Gjykatës së Elbasanit.
Me anë të një postimi në rrjetet sociale ka reaguar edhe vetë Enkeleda Kapedeni, e cila është shprehur se ndidhet keq nga publikimi i këtyre videove, që sipas saj janë bërë vetëm për të dëmtuar imazhin. Ajo ka vazhduar më tej me fjalët “Shpresoj që ky sulm mos të jetë ndaj meje sepse jam grua dhe nene.”.
Reagimi i Enkeleda Kapedanit
Qëndrimi im në lidhje me shpërndarjen e disa vidiove nëpër media.
Si gjyqtare në radhë të parë dhe si nënkryetare e Gjykatës ndjehem keq nga publikimi i këtyre videove vetëm për të më dëmtuar imazhin. Unë si gjyqtare e kam të ndaluar të komentoj, por do pres me qetësi verifikimin e kësaj situate.
As si individ as si gjyqtare nuk jam krenare për vidiot e publikuara. Shpresoj që ky sulm mos të jetë ndaj meje sepse jam grua dhe nene.
Ndërsa kërkoj ndjesë për cilindo që është ndjer keq nga ato video.
Dua të theksoj me forcë se asnjë insinuatë apo përbaltje nuk do më influencojnë të jap drejtësi dhe të punoj ndershmërisht si deri më sot.
