Daver Këraj ka ndërruar jetë para tre muajsh në burgun e Fierit.
Por, ai ende figuron i gjallë në regjistrin e Gjendjes Civile.
Prokuroria e Fierit nuk firmos vërtetimin e vdekjes, por ia kalon përgjegjësinë prokurorisë së kryeqytetit.
Të afërmit kanë denocuar rastin në emisionin “Fiks Fare”.
Që nga tetori i vitit të kaluar familjarët tij janë interesuar nëpër institucione për ta çregjistruar nga regjistri i gjendjes civile.
Mirëpo, mungon firma e prokurorit në vërtetimin e vdekjes.
Neni 55 i ligjit për gjendjen civile e thotë qartë që “vërtetimi i vdekjes të personave që humbin jetën në vendet e vuajtjes së dënimeve me burgim, është i vlefshëm vetëm kur lëshohet nga eksperti mjeko-ligjor dhe nënshkruhet nga prokurori”.
Ndërkohë burgu i Fierit ka lëshuar skedën e vdekjes dhe ka njoftuar zyrën e gjendjes civile të Gjirokastrës dhe prokurorinë për ndarjen nga jeta të të dënuarit Daver Këraj.
Fiks Fare kërkoi informacion në Prokurorinë pranë Gjykatës së Shkallës së Parë në Fier për këtë rast.
Në përgjigjen e saj Prokuroria e Fierit tha se familjarët nuk kanë paraqitur asnjëherë pranë këtij institucioni kërkesë për marrje informacioni. (Gjë e cila u hodh poshtë nga emisioni)
Gjithashtu, në përgjigjen e saj Prokuroria e Fierit e kaloi te Prokuroria e Tiranës përgjegjësinë për dhënien e informacionit dhe lëshimit të vërtetimit të vdekjes së të dënuarit, pasi ai ka ndërruar jetë në Qendrën Spitalore të Tiranës.
Por, institucioni s’ka kthyer ende përgjigje.
Ndërkohë, neni 54 i ligjit për gjendjen civile përcakton afatin e deklarimit të vdekjes, i cili bëhet brenda 10 ditëve nga ndodhja . Madje ky nen ngarkon Shërbimin e Gjendjes Civile, i cili kur ka të dhëna se persona të vdekur vazhdojnë të qëndrojnë të regjistruar në regjistrin themeltar dhe në Regjistrin Kombëtar të Gjendjes Civile, të ngrenë padi në gjykatë për të vërtetuar vdekjen.
Por edhe ky veprim nuk është bërë.
