Ministrja e Shtetit për Marrëdhëniet me Parlamentin Elisa Spiropali ishte e ftuar mbrëmjen e sotme në Report Tv ku komentoi deklaratën e kolegut të saj, Ministrit të Turizmit, Blendi Klosi, se valët e muzikës përhapin koronavirusin.
Spiropali u përpoq disa herë ta shmangte këtë temë por në fund tha se nuk ka një studim që e vërteton një gjë të tillë, duke shtuar se nuk është dakord me atë çfarë tha Klosi.
“Ka një shprehje të bukur që thotë se edhe lumi nuk është njësoj. Nuk besoj se shpresoni të merrni dy herë të njëjtën deklaratë në këtë studio.Nuk mund as të jesh dakord as të mos jesh dakord mbi një çështje për të cilën nuk ke asnjë ekspertizë.
Sigurisht që nuk ka një studim. Sbesoj se pretendoni nga Klosi ekspertizë me këtë çështje. Meqë më kujtuat kohët e mjaftiti dhe kohët e vjetra të protestës dhe angazhimit tim, unë në Shkodër nuk kam shkuar njëherë por shumë herë, me FRESH për të ngritur zëri mbi ata të rinj që në atë kohë në shkodër hiqeshin nga puna pa të drejtë”, tha Spiropali.
Kujtojmë se para dy ditësh ministri Blendi Klosi deklaroi se zonat me muzikë janë zona ku virusi përhapet më shumë se në çdo vend tjetër pasi valët e muzikës janë ato që përçojnë virusin. Sipas tij, në distancat ku ka valë muzike përhapja e virusit është më e madhe.
Kjo deklaratë e tij ngjalli shumë debate dhe meme në rrjetet sociale, pasi deri më tani askush nuk e kishte thënë dhe provuar diçka tê tillë më parë.
