Raundi i dytë i bisedimeve të drejtpërdrejta mes Ukrainës dhe Rusisë, i mbajtur në Stamboll, përfundoi pa ndonjë përparim konkret në drejtim të një armëpushimi.
Pavarësisht pritshmërive të ulëta, të dyja palët arritën të bien dakord vetëm për shkëmbimin e të burgosurve të luftës, konkretisht, të sëmurët, të plagosurit rëndë dhe ata nën moshën 25 vjeç.
Ukraina insistoi në një armëpushim të pakushtëzuar për të paktën 30 ditë, në tokë, në det dhe në ajër, por sipas zyrtarëve ukrainas, Rusia e refuzoi sërish këtë kërkesë, duke propozuar vetëm ndërprerje të përkohshme të luftimeve në disa zona specifike të frontit. Detaje mbi këto zona nuk u bënë publike.
Ministri ukrainas i Mbrojtjes, Rustem Umerov, tha se Kievi kishte dorëzuar më herët propozimet për një armëpushim të përgjithshëm, por pala ruse i paraqiti të vetat vetëm gjatë takimit.
Nga ana tjetër, Rusia konfirmoi se është në proces për dorëzimin e trupave të 6,000 ushtarëve ukrainas dhe përsëriti kërkesat e saj të njohura, që përfshijnë tërheqjen e ushtrisë ukrainase nga katër rajone të pushtuara dhe çmobilizimin e forcave të saj.
Kievi i dorëzoi gjithashtu Moskës një listë me qindra fëmijë të zhvendosur me forcë drejt Rusisë, duke kërkuar kthimin e tyre.
Përgjigja e Rusisë për këtë dhe për çështjet e tjera pritet deri në fund të qershorit, ndërsa pala ukrainase theksoi nevojën për një takim të drejtpërdrejtë mes presidentëve Zelensky dhe Putin, megjithëse nuk ka ende sinjale për një zhvillim të tillë.
Presidenti Zelensky, duke folur nga samiti i Vilniusit, deklaroi se Rusia nuk ka dhënë asnjë sinjal serioz për t’i dhënë fund luftës, dhe kërkoi intensifikim të sanksioneve ndërkombëtare ndaj Moskës.
Ndërkohë, presidenti amerikan Donald Trump, ndonëse ka kërkuar një zgjidhje të shpejtë për konfliktin, është kritikuar për vonesën në vendosjen e masave të reja ndëshkuese ndaj Rusisë.
Së fundmi, ai ka ashpërsuar retorikën, duke e cilësuar Putinin “të çmendur” pas valës më të fundit të sulmeve ajrore ndaj Ukrainës, deklaratë që Kremlini e komentoi si shenjë të “mbingarkesës emocionale”.
