Para 2 ditësh në rrjet qarkulloi video e disa turistëve italianë që largohen me vrap nga një restorant në Berat, pa paguar faturën e darkës që konsumuan.
Ndërkohë që kryeministrja italiane Giorgia Meloni ka dhënë urdhër që të paguhet fatura nga e cila turistët ja kanë mbathur nga restoranti ‘Guva’.
Ambasada e Italisë në Tiranë, ka dalë me një deklaratë për mediat, ku theksohet se kanë kryer pagesën e llogarisë së lënë pa paguar nga turistët italianë, në një restorant në Berat. Selia diplomatike thotë se sipas porosisë së kryeministres Meloni, ambasadori ka qenë sot në Berat.
“Sipas porosisë së Kryeministres Giorgia Meloni, kryem pagesën e llogarisë së lënë pa paguar nga një grup turistësh italianë në një restorant në qytetin e Beratit. Italianët u përmbahen rregullave dhe i shlyejnë detyrimet e tyre dhe urojmë që ndodhi të tilla të mos përsëriten më”. Kryeministrja italiane, pasi kishte mësuar atë çfarë kishte ndodhur nga vetë homologu shqiptar Edi Rama, ka kërkuar që të rregullohej gabimi, e që sipas saj, të mos humbasë respekti i Italisë. Kjo u bë e ditur nga kryeministri Edi Rama, i cili tha për “La Stampa” se Meloni i dha urdhër ambasadorit për të paguar faturën.
Në intervistën, kryeministri shqiptar ka treguar se Meloni i ka thënë ambasadorit Italian që duhet të paguajë menjëherë faturën pasi Italia nuk mund ta humbasë respektin në këtë mënyrë.
“Në mediat shqiptare dhe në TikTok nuk u fol veçse për një grup italianësh që u arratisën nga një restorant në Berat pa paguar. Pronari e hodhi poshtë. Kur i thashë Giorgias, të gjithë qeshën. Ajo bërtiti dhe urdhëroi ambasadorin: “Shko dhe paguaj faturën për këta budallenj, të lutem, dhe bëj një deklaratë! Italia nuk mund të humbasë respektin kështu”, tha Rama për La Stampa.
