Presidenti i Shteteve të Bashkuara, Donald Trump, ka nënshkruar një Urdhër Ekzekutiv për tërheqjen e vendit nga Këshilli i OKB-së për të Drejtat e Njeriut.
Po ashtu, ai ka urdhëruar ndalimin e të gjitha financimeve të mëtejshme për Agjencinë e Kombeve të Bashkuara për Ndihmën dhe Punët (UNRWA) dhe për Organizatën e Kombeve të Bashkuara për Arsimin, Shkencën dhe Kulturën (UNESCO).
Ky vendim parashikon gjithashtu një rishikim të plotë të çdo financimi shtesë që SHBA ofron për Kombet e Bashkuara.
Presidenti Trump tha se SHBA do të vijojë angazhimin e saj me OKB-në vetëm nëse kjo organizatë përmirëson performancën e saj.
“Ka një potencial të madh dhe bazuar në këtë, ne do të vazhdojmë angazhimin tonë, por ata duhet të bashkohen,” u shpreh ai. “OKB nuk po udhëhiqet siç duhet dhe nuk po e bën punën e saj.”
“Duket se ne kurrë nuk marrim ndihmë. Ky duhet të jetë qëllimi parësor i OKB-së,” tha ai.
Zëdhënësi i OKB-së, Stephane Dujarric, vlerësoi mbështetjen e SHBA-së ndër vite, duke theksuar se ajo ka ndihmuar në shpëtimin e jetëve dhe avancimin e sigurisë globale.
“Sekretari i Përgjithshëm i OKB-së mezi pret të vazhdojë marrëdhëniet e tij produktive me Presidentin Trump dhe qeverinë amerikane për të forcuar këtë bashkëpunim në botën e sotme të trazuar,” tha Dujarric.
Ky vendim i Shtëpisë së Bardhë pritet të ndikojë ndjeshëm në funksionimin dhe financimin e disa prej programeve kyçe të OKB-së.
