Presidenti i SHBA, Donald Trump, ka shprehur dëshirën për të takuar menjëherë presidentin rus, Vladimir Putin, me qëllim arritjen e një marrëveshjeje që do t’i jepte fund pushtimit të Ukrainës nga Rusia.
Trump theksoi se presidenti ukrainas, Volodymyr Zelensky, është i gatshëm të bisedojë për përfundimin e luftës.
“Nga ajo çfarë kam dëgjuar, Putini dëshiron të më takojë, dhe do ta bëjmë sa më shpejt që është e mundur. Unë do ta takoja menjëherë”, tha Trump për gazetarë në Shtëpinë e Bardhë të enjten.
Në një lidhje video me Forumin Ekonomik Botëror në Davos, Trump shprehu dëshirën për të takuar Putin dhe theksoi se përpjekjet e SHBA për arritjen e një marrëveshjeje paqeje kanë filluar, edhe pse nuk dha detaje.
Gjatë fushatës presidenciale të vitit të kaluar, Trump kishte thënë se do të jepte fund luftës shpejt, por tani ai pranon se mund të nevojiten muaj për arritjen e paqes.
Ndërkohë, Zelensky gjithashtu foli në Forumin Ekonomik Botëror, duke theksuar nevojën për një forcë paqeruajtëse prej 200,000 trupash për të siguruar një marrëveshje armëpushimi me Rusinë.
Ai tha se Shtetet e Bashkuara duhet të jenë pjesë e kësaj force për të garantuar suksesin e saj. Zelensky theksoi se një forcë paqeruajtëse pa SHBA-në nuk do të ishte efektive dhe mund të krijonte ndasi mes NATO-s dhe SHBA-së, diçka që Putin dëshiron ta shfrytëzojë për të ndarë aleancën perëndimore.
