Fluturimet në dy prej aeroporteve më të frekuentuara në botë, në Doha dhe Dubai, u pezulluan të hënën, duke shkaktuar radhë të gjata, anulime dhe vonesa masive, pas tensioneve të reja në Lindjen e Mesme.
Mbyllja e përkohshme e hapësirës ajrore nga Katari, Bahreini dhe Kuvajti, erdhi si reagim ndaj një sulmi iranian ndaj një baze amerikane në kryeqytetin e Katarit, Doha.
Pasojat ishin të menjëhershme: qindra fluturime u anuluan ose devijuan, ndërsa mijëra pasagjerë mbetën të bllokuar në terminale, shpesh pa informacion dhe ndihmë të mjaftueshme.
“Nuk kam fjetur për 19 orë dhe po pres në këtë radhë prej nëntë orësh,” u shpreh Lily Rogers, 21 vjeç, një studente që priste në Aeroportin Ndërkombëtar Hamad, në një rradhë që zgjatej për rreth 200 metra. Sipas saj, i vetmi shërbim i ofruar gjatë pritjes ishte furnizimi me ujë.
Sipas FlightRadar24, në aeroportin e Dohas u anuluan rreth 250 fluturime dhe 238 të tjera pësuan vonesa, ndërsa në aeroportin ndërkombëtar të Dubait u anuluan 145 fluturime dhe mbi 450 u vonuan. Disa pasagjerë u përfshinë edhe në përplasje fizike për shkak të rrëmujës së krijuar në radhë.
Qatar Airways njoftoi se po punon për rikthimin e normalitetit në orarin e fluturimeve, por paralajmëroi se ndërprerjet mund të zgjasin deri më 26 qershor. Nga ana tjetër, autoritetet e aeroportit të Dubait dhe zyra e shtypit e qeverisë nuk kanë komentuar mbi situatën.
Aeroportet e rajonit, sidomos ato të Katarit dhe Emirateve, janë kthyer në nyje të rëndësishme tranziti për fluturimet ndërmjet Europës dhe Azisë, veçanërisht pas nisjes së luftës në Ukrainë dhe shmangies së hapësirës ajrore të Rusisë e Ukrainës nga shumica e linjave ajrore.
Tensionet në rritje mes Izraelit dhe Iranit, të pasuara nga sulmet izraelite më 13 qershor, i kanë shtyrë disa kompani të mëdha si British Airways dhe Lufthansa të pezullojnë fluturimet në destinacione të caktuara në Lindjen e Mesme, për arsye sigurie.
Ekspertët e aviacionit paralajmërojnë se efektet e mbylljes së hapësirës ajrore do të ndihen përtej rajonit. Sipas analistit Brendan Sobie, vetëm 22% e pasagjerëve që udhëtojnë përmes Aeroportit Hamad kanë Katarin si destinacion final, pjesa tjetër përdor këtë qendër si pikë ndërlidhjeje drejt pjesës tjetër të botës.
Kriza aktuale tregon edhe një herë sa e ndjeshme është zinxhiri global i udhëtimeve ajrore ndaj konflikteve rajonale.
