Një ngjarje tronditëse ka ndodhur të dielën pasdite në kryeqytetin belg, ku një djalë 12-vjeçar humbi jetën pasi u godit nga një makinë policie gjatë një ndjekjeje.
Sipas raportimeve të mediave belge, ngjarja ndodhi rreth orës 17:50 në komunën Ganshoren të Brukselit. Fëmija ishte duke udhëtuar me një skuter elektrik në momentin që ndodhi aksidenti fatal.
Zyra e Prokurorisë së Brukselit ka konfirmuar përfshirjen e një automjeti policor në incident. “Një automjet policie u përfshi në aksident. Viktima është një fëmijë i lindur në vitin 2013, i cili ka ndërruar jetë”, thuhet në deklaratën zyrtare të autoriteteve.
Menjëherë pas aksidentit, ekipet e emergjencës ndërhynë në vendin e ngjarjes dhe i dhanë ndihmën e parë të miturit. Ai u transportua urgjentisht në spital, por pavarësisht përpjekjeve të mjekëve, plagët e marra rezultuan fatale.
Ngjarja ka shkaktuar reagime të forta dhe një ndjeshmëri të thellë në publikun belg, ndërsa autoritetet kanë nisur hetimet për të sqaruar rrethanat e sakta të aksidentit dhe për të përcaktuar nëse veprimet e policisë ishin të justifikuara.
