Kryeministri i Maqedonisë Veriore, Zoran Zaev reagoi mbrëmjen e djeshme në lidhje me ngjarjen e rëndë që ndodhi në Tetovë, ku spitali modular i pacientëve me koronavirus u përfshi nga një zjarr i fuqishëm. Nga flakët të paktën 10 persona raportohet se kanë humbur jetën.
Zaev ka shkruar në llogarinë e tij në Facebook se lufta për jetën po vazhdon ende, ndërkohë që u ka shprehur ngushëllime familjarëve të të vdekurve.
“Një tragjedi e madhe ka ndodhur në qendrën COVID-19 të Tetovës. Një shpërthim ka shkaktuar një zjarr. Zjarri është shuar, por shumë jetë janë shuar. Lufta për jetën po vazhdon ende, dhe të gjitha shërbimet reaguan, sakrifikuan dhe shpëtuan njerëzit. U shpreh ngushëllimet më të thella familjarëve të të ndjerëve dhe u uroj shërim të shpejtë të lënduarve. Do të përcaktohen shkaqet e zjarrit, për të cilat autoritetet gjyqësore janë tashmë në fushë.
Kjo është një ngjarje me të vërtetë tragjike dhe mund t’ju siguroj se e gjithë maja e shtetit është e angazhuar për shkarkimin e shpejtë të kësaj situate. Aktualisht është në terren selia e krizës në Komunën e Tetovës”, ka shkruar Zaev.
Kujtojmë se një zjarr i madh shkrumboi mbrëmjen e të mërkurës qendrën spitalore të ‘Covid-19’ në Tetovë. Deri më tani janë zyrtarizuar 14 viktima ndërkohë që mendohet se ky numër mund të jetë akoma më i madh. Zjarri shpërtheu në spitalin modular në Tetovë, për të cilin në mesin e muajit prill është raportuar se janë konfirmuar gabime gjatë ndërtimit.
