Aktualisht finalizimi i Reformës Zgjedhore është çështja më e nxehtë politike, teksa depolitizimi i administratës zgjedhore mbetet ende pezull.
Bashkëkryetari i Këshillit Politik për Reformën Zgjedhore Damian Gjiknuri ka folur sot rreth asaj çfarë po ndodh me bisedimet, teksa është shprehur se nuk po e kupton pse Basha me opozitën nuk po aprovojnë konsensusin për marrëveshjen.
I ftuar në “Real Story”, Gjiknuri deklaroi se marrëveshja për Reformën Zgjedhore nuk ka humbur dhe në produkt janë adresuar të gjitha kërkesat e opozitës.
Sipas tij, Shqipëria nuk ka pasur probleme me administrimin e zgjedhjeve në 15 vitet e fundit nuk ka pasur probleme por është kultura e mospranimit të rezultatit.
”Ajo ishte një marrëveshje që ka adresuar kërkesat e opozitës dhe nuk e di pse nuk ka dhënë ok. Ka qenë një refren politik, ajo marrëveshje nuk ka humbur por ka fituar, ka fituar zgjedhjet, garancitë dhe menaxhimin. Një proces i depolitizuar dhe rezultati që presin shqiptarët. Por e kam bindje se në 15 vitet e fundit Shqipëria nuk ka pasur probleme por ka qenë kultura e mospranimit të zgjedhejve. Është më shumë debat politik. Pra ne fatkeqësisht kthehemi e bëjmë Reforma që nuk ndryshojnë kulturën e mospranimit të rezultatit.”- tha Gjiknuri.
Nga ana tjetër, kryeministri Rama tha në “Opinion” se mazhoranca e ka mbyllur këtë proces dhe ka bërë aq sa i takon, teksa shprehu skepticizmin e tij sa i takon aplikimi të teknologjisë në zgjidhje.
Ambasadorja amerikane Yuri Kim tha dje se topi tashmë është në fushën e Bashës dhe pritet vetëm vendimi i tij për të arritur konsensusin në Këshillin Politik dhe për finalizimin e Reformës Zgjedhore.
Nga ana tjetër, kryedemokrati deklaroi menjëherë pas Kim se vetëm një çështje ka mbetur pa u zgjidhur, depolitizimi i administratës zgjedhore.
Palët politike shkelën më 31 maj afatin e vetëdakordësuar dhe prej 4 ditësh janë 3 ambasadorët, Yuri Kim, Duncan Norman dhe Luigi Soreca që po tentojnë të bindin palët për një marrëveshje.
