Jozefina Topalli rikthehet në politikë fuqishëm, duke shpallur një parti të re. Ish-kryetarja e Kuvendit, pas 7 vitesh e lënë mënjanë nga Partia Demokratike, bëri publike partinë që do të drejtojë me emrin “Lëvizja për Ndryshim”.
Duke prezantuar nismën politike, Topalli tha se nuk do të qëndrojë më në heshtje, do të bashkohet me të rinjtë për të përmbysur më 25 prill treshen Rama-Meta-Basha, që sipas saj luftojnë për karriget e tyre.
“Jam e inspiruar nga shpresa e të rinjve. Nga kauza dhe nga mbështetja, sot këtu, brenda dhe jashtë sallës. Shumë pedagogë, mjekë, nëpunës, qytetarë dhe sipërmarrës janë këtu. Dua të falënderoj dhe miqtë amerikanë që janë të pranishëm. E qartë që kemi përpara një punë të papërfunduar. Kriza e vendit është ekonomike, sociale, morale, shëndetësore etj. E trishtueshme është kur sheh si vendi po boshatiset. E vendosur jam të mos qëndroj anash dhe të mos hesht. Nuk kam frikë, dhe jam sot me këta të rinj për t’i mbështetur për këtë projekt të ri. Ekonomia jonë është tkurrur, dhe për shkak të dështimit tonë si kolektiv për të përgatitur vendin për të ardhmen. Vendet e punës po shkatërrohen, bizneset po mbyllet. Shumë shkolla po mbyllen se rrethet nuk kanë fëmijë. Studentët kanë kufizime të pamerituara. Vazhdojmë të jemi një vend ku ka tensione. Nuk rriten rrogat por rriten çmimet. Jemi në një vend që po zbrazet. Këto janë disa nga indikatorët. Mungesa e besimit mbizotëron në të gjithë vendin. Sfidat që po përballemi janë reale. Nuk ka as qeveri, as opozitë, as Gjykatë të Lartë. Nuk kemi kohë me prit, jemi 6 muaj nga zgjedhja. Fushata ka filluar me ata të tre që bashkohen për të ruajtur karriget dhe llogaritë private. Këta të tre veprojnë sikur Shqipëria është pronë e tyre. Ata vendosin se kush duhet të bëjë biznes me ta, kush duhet të punojë dhe jo, sa do marrë dhe sa jo. Ata të 3 do bëjnë çdo gjë për të mbajtur monopolin politik. Duke thënë gënjeshtra mendojnë se do zhdukin të vërtetën, por jo”, deklaroi ndër të tjera Topalli.
“Unë nuk kam as para as vende pune për të ofruar. Ju ofroj vetëm SFIDE!”, tha ish-nënkryetarja e PD-së, Topalli.
GazetaReforma.com/
