Prej kohësh në Tiranë plehrat janë në çdo cep , në rrugica, në lagjet e rreth qendrës së Tiranës plehrat qëndrojnë në pirgje gjithë ditën duke kulluar lëngje ndotëse dhe aroma të rënda, në sytë dhe këmbët e qytetarëve të kryeqytetit. Kjo situatë ka sjell shqetësim tek qytetarët përshkak se gjendja është alarmante.
Në një postim të datës 1 shtator në rrjetin social Fb, kryetari i bashkisë Erjon Veliaj pranon gjendjen se plehrat kanë pushtuar kryeqytetin, duke vërtetuar denoncimet e opozitës dhe qytetarëve. Kryebashkiaku deklaroi që tani me pastrimin e qytetit do ta marrë përsipër “Eco Tirana”, që ka nisur aksionin e pastrimit të Tiranës, ka marrë këtë kompetencë pasi deri dje pastrimi i qytetit ishte në administrimin e kompanive private.
Veliaj deklaroi në një takim me punonjësit e “Eco Tirana” në datën 7 Shtator, Veliaj se kompanitë private e kanë ndërprerë punën dy muaj para mbarimit të kontratës së shërbimit.
Sipas deklaratës së kryebashkiakut, Bashkia Tiranë ka marrë përsipër të pastrojë qytetin nëpërmjet kompanisë “Eco-Tirana”, ku 51 përqind të aksioneve i ka vetë bashkia, ndërsa 49 për qind një kompani italiane që ka ndërruar disa pronarë në pak muaj e nuk dihet se kush fshihet pas tyre.
Sipas kontratës, “Eco-Tirana” duhet të zbrazë 6396 kosha mbetjesh në ditë. Po ashtu të lajë dhe dezinfektojë 500 vendqëndrime të koshave, ndërsa vijon detyrimi kontraktual që kjo kompani duhet të fshijë 1.9 milionë metra katrorë rrugë dhe lajë 285 mijë metra katrorë sipërfaqe të rrugëve kryesore në ditë.
Kjo është kontrata që duhet zbatuar, por shihet me sy ashiqare ajo që ndodh. Koshat e mbetjeve jo vetëm që janë tej mbushur, por plehrat po shpërndahen në rrugë, duke sjellë një katastrofë të tmerrshme mjedisore. Veliaj tha se pastrimi i plehrave nga tani e tutje do të bëhet nga ndërmarrja e bashkisë, por kërkoi kohë që të vijnë makinat industriale, por çfarë do ndodhë me qytetin përgjatë kësaj kohe?!
Nga ana tjetër pagesat buxhetore për inceneratorin e Tiranës janë duke u rritur progresivisht. Vetëm në periudhën janar-24 korrik 2024 janë çelur nga buxheti i shtetit 700 milionë lekë si pagesa për Integrated Energy BV SPV, kompaninë që menaxhon inceneratorin.
Të dhënat e thesarit që u gjeneruan nga Open Data Albania tregojnë se që nga fillimi i vitit deri me datën 18 korrik ndaj inceneratorit që tashmë administrohet nga Agjencia e Pasurive të Sekuestruara janë kryer rreth 36 transaksione me një shumë që kalon 6.9 milionë eurosh.
Por përse është pritur të shkojë deri në këtë gjendje qytetit? Përse çështja e mbetjeve nuk është zgjidhur ende edhe pse qytetarët paguajnë taksa për pastrimin e gjelbërimin?
