Zvicra rikthen Granit Xhakën pas pezullimit për certifikatat e COVID-19, mbetet kapiten

Granit Xhaka rikthehet në Kombëtaren e Zvicrës pas pezullimit të lidhur me skandalin e certifikatave të falsifikuara të COVID-19. Federata Zvicerane e Futbollit ka vendosur të rikthejë mesfushorin shqiptar dhe sulmuesin Breel Embolo, të cilët munguan në katër ndeshjet ndërkombëtare të shtatorit dhe tetorit.

Vendimi është marrë nga bordi qendror i federatës, pas shqyrtimit të procedurave ligjore që lidhen me certifikatat e falsifikuara gjatë viteve 2021 dhe 2022. Në vlerësimin e saj, federata ka marrë parasysh edhe pasojat sportive të pezullimit për të dy futbollistët.

Për Xhakën, rikthimi shoqërohet me një tjetër vendim të rëndësishëm: ai do të vazhdojë të mbajë shiritin e kapitenit të Zvicrës. Trajneri Murat Yakin, stafi teknik dhe këshilli i lojtarëve kanë votuar unanimisht në favor të vazhdimit të tij në këtë rol.

Drejtori i Kombëtares zvicerane, Pierluigi Tami, ka sqaruar se vendimi është marrë pas një shqyrtimi të kujdesshëm të rrethanave të secilit rast, procedurave ligjore dhe pasojave sportive që kanë përjetuar futbollistët.

Trajneri Murat Yakin pritet të publikojë më 5 nëntor listën e të grumbulluarve për dy përballjet e fundit të Ligës së Kombeve.

Zvicra do të luajë më 13 nëntor kundër Sllovenisë në Maribor, ndërsa më 16 nëntor do të presë Skocinë në St. Gallen.

Me katër fitore në katër ndeshjet e zhvilluara deri tani, përfaqësuesja helvete synon ta përfundojë me rezultate pozitive këtë fazë të kompeticionit, tashmë edhe me Granit Xhakën të rikthyer në skuadër dhe në rolin e kapitenit.