Ish-deputeti i Partisë Demokratike, Ervin Salianji, ka dërguar një kallëzim në SPAK nga burgu, ku ndodhet i dënuar, duke kërkuar hetimin e manipulimeve të sistemit TIMS.
Salianji, i cili ka qenë kryetar i Komisionit Hetimor Parlamentar për këtë çështje, akuzon Kryetaren e Kuvendit, Spiropali, për mospërmbushje të detyrave të saj, duke mbajtur në sirtar dosjen me përfundimet e komisionit që duhet të ishte dorëzuar në SPAK për hetime të mëtejshme.
Sipas Salianjit dhe PD-së, konkluzionet e Komisionit Hetimor nxorrën në pah ndërhyrjet e qëllimshme në sistemin TIMS për interesa kriminale, të kryera nga individë të lidhur me qeverinë dhe pushtetin. PD thekson se këto ndërhyrje kanë dëmtuar rëndë sigurinë kombëtare dhe se përfundimet e hetimit janë një bazë e fortë për ndjekje të mëtejshme nga SPAK.
Salianji përmes kabinës telefonike në burg, u shpreh:
“Të gjenden arsyet, qëllimi dhe përgjegjësia për këtë akt të rende, të pengimit të drejtësisë dhe mbrojtjes së krimit, që të çon vetëm në një drejtim! Autori është Edi Rama. Ky skandal, ku doganierja e parlamentin nuk e dergon në SPAK hetimin parlamentar pavarësisht se ligji e parashikon dhe kryetari i komisionit e ka depozituat prej muajsh, duhet hetuar! Ato hetime parlamentare janë punë e kontribut disa mujor me kolegë dhe ekspertë dhe është një sherbim i vyer ndaj interesit publik, lidhur me nderhyrjet kriminale në sistemin TIMS. Ato konkluzione janë serioze dhe profesionale dhe ndihmojnë në zbardhjen e të vertetës dhe të përgjegjësive. Nuk janë rekuizita personale e një kryeparlamentareje kukull. E ka për detyrë të bëjë atë që thotë rregullorja”.
Ai theksoi më tej bindjen se një nga arsyet e burgosjes është dhe zbulimi i manipulimeve me TIMS për të ndihmuar krimin e organizuar.
“Padyshim se ajo njeh Skenderbeun e saj mbi çdo normë e ligj dhe është gati të bëjë kamikazen. Por krimi i TIMS në këtë menyre dyfishohet. Nderhyrjeve të paligjshme në sistem u shtohet paligjshmeria e Spiropalit që nuk dergon dosjen në SPAK.
E gjitha kjo vërteton se gjetjet e Opozitës qëndrojnë. Verteton dhe një herë lidhjet e qeverisë me krimin, dhe sherbimin e saj ndaj bandave. Jam i bindur edhe më shumë sot se një nga arsyet e burgosjes time politike është dhe zbulimi i manipulimeve me TIMS pêr të ndihmuar krimin e organizuar. Dhe kjo është padyshim një arsye e një motiv më shumë për betejë me regjimin, dhe një konfirmim i kauzave tona të drejta”, tha Salianji.
