Anglezët nuk janë ende dakord për rezultatin në finalen e Europianit ndaj Italisë, ku humbën me penallti pas 120 minutave në barazim 1-1. Luke Shaw kaloi anglezët në avantazh që në minutën e tretë të takimit, ndërsa Bonucci barazoi për italianët në pjesën e dytë, me sfifën që u luajt në stadiumin mitik të “Wembley”.
Sipas mediave britanike, janë plot 150 mijë tifozë të cilët kanë kërkuar me një peticion që takimi të luhet sërish, për arsyen se mbrojtësi italian, Giorgio Chiellini, u tregua “hileqar”, në rastin ku mbajti sulmuesin anglez, Bukayo Saka prej fanelle.
Britanikët thonë se kjo ndeshje nuk ishte e ndershme dhe e drejtë, për shkak të Chiellini duhej të ndëshkohej me karton të kuq pas atij episodi. Gjithashtu, tifozët e “3 Luanëve” deklarojnë se Italia luajti duke goditur kundërshtarin dhe duke shkaktuar shumë faulle anti-sportive.
Kombëtarja e Mançinit në mbrëmjen e 11 korrikut u shpall kampione e Europës, ku mposhti falë goditjeve të 11-metërshave kombëtaren e “3 Luanëve”. Për anglezët, gabuan Marcus Rashford, Jadon Sancho dhe Bukayo Saka. Rashford goditi shtyllën, ndërsa Sancho dhe Saka u ndaluan nga portieri italian Gianluiggi Donnarumma.
Italia fitoi europianin pas plot 53 vitesh, ndërsa Anglia mori pjesë në finalen e parë të një kompeticioni madhor që prej Botërorit të 1966-ës së largët, ku fituan edhe trofeun.
