Çështja e këngës së Elseid Hysajt si rit prezantimi para shokëve të Lazios po fillon të marrë përmasa gjithnjë e më serioze. Ai që duhej të ishte një moment humori mes miqsh, është kthyer në një përplasje të mirëfilltë me tifozët e skuadrës mbi ideologji politike.
Hysaj zgjodhi të këndonte “Bella Ciao”, një këngë e vjetër partizane në Itali, por që ka marrë famë përsëri së fundmi si pasojë e serialit “Casa de Papel”. Tifozët e Lazios, të cilët janë në një numër të madh mbështetës të ekstremit të djathtë, nuk kanë pëlqyer një këngë të tillë, ndaj kanë vërshuar kritikat në adresë të lojtarit shqiptar, deri në kërcënime.
Si të mos mjaftonin ironitë, talljet apo edhe mallkimet në rrjetet sociale, disa prej tifozëve të Lazios kanë kaluar çdo kufi. “Calciomerato” ka bërë me dije se disa prej tifozëve kanë shkuar darkuar skuadra. Shumë prej futbollistëve ishin larguar, ndërsa “përballja” është bërë para hotelit ku qëndron ekipi i grumbulluar.
Aty pranë është gjendur drejtori sportiv, Igli Tare, si dhe mbrojtësi i Kombëtares kuqezi, Hysaj. Të pranishëm edhe forca speciale policore, gjithmonë në ruajtje të ekipit kryeqytetas.
Ndërsa dje në mbrëmje është thelluar akoma më shumë skandali. Disa tifozë të Lazios kanë vendosur një banderolë fyese në urën “Corso Francia” ku shkruhej: “Hysaj një krimb, Lacio është fashiste”.
