Këtë pasdite dhjetëra qytetarë nga vende të ndryshme të Kosovës dhe jo vetëm kanë shkuar në pikën kufitare në Morinë për të pritur presidentin e Kosovës, Hashim Thaçi, i cili po kthehet në vendin e tij nga Haga pas intervistimit katër ditor që kishte nga Dhomat e Specializuara.
Ndërkohë që kreu i shtetit kosovar njoftoi pak më parë se nesër në orën 20:00 do të flas për katër ditët e kaluara në Hagë. Thaçi nënvizon se askush nuk mund ta rishkruajë historinë e Kosovës.
“Sapo kam zbritur në Tiranë, nga kthimi prej Hagës dhe në mbrëmje do të arrij në Kosovë. Nesër në orën 20:00 do të flas për katër ditët e kaluara në Hagë. Ju uroj një fundjavë të bukur. Ju siguroj se askush nuk mund ta rishkruajë historinë tonë! HTH”, shkruan Thaçi.
Thaçi për katër ditë u mor në pyetje nga Dhomat e Specializuara në Gjykatën e Hagës. Zyra e Prokurorit të Specializuar ka njoftuar muajin e kaluar se më 24 prill ka paraqitur një aktakuzë për krime lufte dhe krime kundër njerëzimit kundër presidentit Thaçi, kryetarit të Partisë Demokratike të Kosovës, Kadri Veseli, dhe disa të tjerëve, emrat e të cilëve nuk janë bërë publikë.
