Drejtori i OBSH-së për Europën, Hans Kluge, ka patur gjatë ditës së sotme një takim me ministren e Shëndetësisë, Ogerta Manastirliu, ku ndër të tjera patën edhe disa marrëveshje bashkëpunimi dhe një konferencë të përbashkët për media.
I pyetur nga gazetarët se kur parashikohet të zbatohet strategjia e OBSH-së për Ballkanin dhe specifikisht për vendin tonë në lidhje me testet e shpejta anti-gen, Dr. Hans Kluge, deklaroi se parashikohet që për rreth 8-10 javë, testet e shpejta do të vijnë edhe në Shqipëri.
“Jemi marrë pikërisht me kohën e dorëzimit të këtyre testeve pas 8 ose 10 javësh. Ne po përpiqemi që ta përshpejtojmë procesin, që ta shkurtojmë këtë afat. Sigurisht që çdo ditë është e domosdoshme në një luftë të tillë, por për t’u treguar objektiv shkenca nuk ka lëvizur kurrë kaq shpejt sa tani, për shkak të mirëkoordinimit”, është shprehur para gazetarëve drejtori i OBSH-së për Europën.
Gjithashtu drejtori i OBSH-së deklaroi se testimi nuk është e vetmja zgjidhje e parandalimit të përhapjes së koronavirusit. Kluge u shpreh se edhe fazat e tjera pas testimit, janë shumë të rëndësishme, si gjurmimi dhe izolimi.
“Situata është nën kontroll, por duhet të tregojmë shumë kujdes, se ka pasur vende që ia kanë hedhur në fazën e parë, por janë goditur më shumë në fazën e dytë, duhet të jemi vigjilentë, shkollat nuk kanë valë të lartë transmetimi,dy probleme janë vënë re gjatë kësaj “lufte” prej fillimit të pandemisë, lodhja nga pandemia dhe stafi mjekësor”, ka thënë në konferencë Kluge./GazetaReforma.com/
