Vorë– 90 familje kanë mbetur pa shtëpi, ndërsa dhjetëra të tjera vijojnë të qëndrojnë në çadra.
Ditën e sotme 5 pallate janë shpallur të pabanueshme për shkak të dëmtimeve që kanë marrë nga tërmeti i 26 nëntorit.
Banorët u bëjnë thirrje autoriteteve, pasi siç shprehen deri më tani janë lënë në harresë.
Ata po largojnë ç’të munden nga shtëpitë dhe janë zhvendosur te të afërmit ose në banesa me qira.
Më poshtë janë disa nga dëshmitë e banorëve:
“Po paguajmë qira, bashkia nuk ka thënë gjë për bonusin që flitet.”
“200 veta. Ja ka gjet ndonjëri bashkia apo Belinda Balluku shtëpinë këtyre familjeve që mos ta ndjejnë këtë tërmet që ra, jo. Gjithësecili e ka gjetur vetë.”
“Vetë çdo gjë.”
“Ky është një tërmet i dytë. Shkojmë në bashki dhe ngrenë supet.”
“Jemi as në qiell dhe as në tokë.”
“Nuk e dimë tani do të na japin qira shtëpie, çfarë do të bëhet me pallatin?”
Ata janë të detyruar ta paguajnë vetë qiranë, pasi shteti nuk u ka dhënë asnjë ndihmë.
Të tjerët, që nuk kanë mundësi të përballojnë një banesë më qira, qëndrojnë në çadra.
“Në çadër, pa larë.”
“Ngrohje nuk ka, një kalorifer që kishim na e morën se thanë mos digjeni.Tani kemi mbetur në të ftoftë dhe shi.”
Banorët e Vorës, njëzëri, kërkojnë që shteti të marrë masa për strehimin e tyre, duke paralajmëruar protesta, që do të arrijnë deri në bllokimin e autostradës Tiranë-Durrës.
