Një tërmet me magnitudë 6.1 goditi mëngjesin e së enjtes afër ishullit grek të Kretës, duke shkaktuar lëkundje të ndjeshme në një zonë të gjerë që përfshin Greqinë, Qipron, Egjiptin dhe Izraelin.
Sipas të dhënave të Qendrës Sizmologjike Euro-Mesdhetare dhe Shërbimit Gjeologjik të SHBA-së, tërmeti ndodhi në orën 06:19 të mëngjesit me orën lokale.
Epiqendra u regjistrua në veri të Kretës, në një thellësi prej rreth 69 kilometrash. Më konkretisht, ishte rreth 59 kilometra nga qyteti Ágios Nikólaos dhe 74 kilometra nga kryeqyteti i ishullit, Irákleion.
Dridhjet u ndjenë në të gjithë ishujt e Egjeut, si dhe në pjesë të Greqisë kontinentale, përfshirë Athinën.
Disa raportime erdhën edhe nga vende më të largëta si Izraeli, Egjipti dhe Qiproja.
“E shkurtër, por e fuqishme. Shtëpia u drodh e gjitha dhe më zgjoi,” raportoi një banor i Ágios Nikólaos në faqen e EMSC.
Kjo zonë e Mesdheut është një nga më aktive në aspektin sizmik në Evropë, për shkak të ndërveprimit midis pllakave tektonike afrikane dhe euroaziatike.
Harku Helenik, që përshkon këtë rajon, është veçanërisht i njohur për tërmete të mëdha dhe shpeshherë dëmtuese.
Tërmeti i së enjtes vjen vetëm një javë pas një tjetër tërmeti me magnitudë 6.0 që goditi Detin Mesdhe dhe u ndje fuqishëm në të njëjtin rajon, përfshirë Kretën dhe Ishujt Egje.
