Aerosolterapia është shpesh një rekomandim i mjekëve pediatër për trajtimin e bronkioliteve dhe alergjive, por, sipas Klara Hoxhallarit, farmaciste, duhet pasur kujdes gjatë përdorimit, sidomos te fëmijët.
Ajo theksoi në emisionin ‘Health o’clock’ se, ndonëse është një terapi e sigurt për fëmijët, përdorimi i gabuar i preparateve pa solucion fiziologjik mund të shkaktojë takikardi, sidomos te bebet.
“Sistemi duhet të përdorë gjithmonë tretësirë përpara se të aktivizohet aparatura. Për fëmijët, është shumë i sigurt, përjashtim bëjnë bebet, ndaj duhet të jemi shumë të kujdesshëm. Përdorimi i bronkodilatatorëve mund të shkaktojë takikardi nëse nuk përdoret tretësirë apo nëse jepet në dozë të tepërt,” shpjegoi farmacistja.
Në rastet e reaksioneve të padëshiruara, Hoxhallari këshillon që prindërit të reagojnë menjëherë duke nxjerrë fëmijën në ajër të pastër ose duke i bërë kompresë me ujë të ftohtë për të qetësuar fëmijën.
“Në raste të tilla, këshillohet që prindi ta nxjerrë fëmijën në ajër të pastër, ose t’i bëjë kompresa me ujë të ftohtë. Të dyja funksionojnë për qetësimin e fëmijës. Nëse shikojnë se nuk ka përmirësim, atëherë duhet të lidhen menjëherë me mjekun,” shtoi Hoxhallari.
Farmacistja gjithashtu theksoi se aerosolterapia duhet të bëhet vetëm pas rekomandimit të mjekut dhe në kushte të sigurt në shtëpi, duke siguruar që fëmija të jetë ulur dhe maska të jetë e vendosur mirë në fytyrë.
