Të shtëna me armë zjarri kanë ndodhur gjatë natës në Tiranë. Një person i paidentifikuar ende ka qëlluar gjatë natës që lam pas në një banesë të pabanuar në Lundër.
Ende nuk dihen arsyet e të shtënave, ndërkohë që mësohet se në banesën e katit të tretë që është qëlluar 3 herë nuk banonte askush. Në vendngjarje ka shkuar policia së bashku me grupin hetimor për të bërë të mundur zbardhjen e ngjarjes dhe arrestimin e autorit.
Njoftimi i Policisë:
Më datë 26.03.2023, në Lundër, në fasadën e katit të tretë të një banese janë konstatuar shenja plumbi, dhe paraprakisht dyshohet se është qëlluar gjatë natës nga një person ende i pa identifikuar. Po punohet për identifikimin dhe kapjen e autorit. Materialet i kaluan Prokurorisë, për veprime të mëtejshme procedurale.
Detaje të reja kanë dalë nga të shtënat me armë gjatë natës në Lundër. Mësohet se banesa që është qëlluar është në pronësi të zyrtarit të OSHEE-së, Dorian Balla. Balla për mediat ka deklaruar se nuk ka asnjë konflikt nga profesioni i tij.
Ndërkohë që ka theksuar se kjo ngjarje mund të ketë ndodhur për shkak të një konflikti të hershëm të tij për pronat. Fatmirësisht personat kanë qëlluar në katin e tretë ku nuk banonte njeri, pasi familje jetonte në katin e parë dhe të dytë.
