Ambasadori i Bashkimit Europian në Tiranë, Silvio Gonzato, theksoi sot mbështetjen për krijimin e task-forcës nga SPAK, e cila ka për qëllim monitorimin e zgjedhjeve të 11 majit.
Ai vlerësoi këtë nismë si një hap të rëndësishëm për të garantuar zgjedhje të lira dhe të ndershme.
Gjatë fjalës së tij në një tryezë të përbashkët me Komisionerin Shtetëror të Zgjedhjeve, kryeprokurorin Olsian Çela, kreun e SPAK, Altin Dumani dhe përfaqësues të partive politike, Gonzato theksoi se blerja e votës dhe presioni ndaj votuesve vazhdojnë të mbeten probleme serioze në Shqipëri.
“Blerja e votës dhe presioni ndaj votuesve vijon të jetë problem në Shqipëri. Mirëpres nismën e ndërmarrë nga aktorët kryesorë, si Komisioni Qendror i Zgjedhjeve, Prokuroria e Përgjithshme, SPAK dhe Policia e Shtetit, për të koordinuar përpjekjet e tyre para zgjedhjeve të 11 majit, për të adresuar krimet e mundshme zgjedhore, si garanci për besim në këto zgjedhje. Dhe mezi po pres që të dëgjoj më shumë nga këto institucione lidhur me nismën e tyre dhe koordinimin. Keqpërdorimi i burimeve administrative është një tjetër çështje e ngritur në raporte të ndryshme, si një çështje që kërkon më shumë vëmendje për të siguruar kushte të barabarta loje”, tha Gonzato
