Temperaturat këtë fundjavë do të pësojnë një ulje të ndjeshme duke bërë që në Tiranë dhe në qytetet të tjera të bjerë edhe borë. Meterologu Akil Osmani ka thënë në Neës 24 se në ditët në vijim temperaturat do të zbresin në -15 gradë në zonat malore, ndërsa në Ultësirën Perëndimore do të arrijnë vlerat -5 apo -6 gradë Celsius duke bërë që reshjet e borës të fillojnë që ditën e shtunë pasdite dhe të zgjasin deri ditën e diel.
“Ndërsa maksimumet pritet të luhaten nga vlerat 7-8 gjatë ditës së shtunë, ndërsa të dielën një rënie më e ndjeshme e tyre duke zbritur në vlerat 4 gradë celsius në vlerat maksimale.
Po, gjatë kësaj fundjave pritet që reshjet e dëborës të përfshijnë vendin tonë. Që në orët e para të ditës së shtunë pritet që mbi 400 metër nga niveli i detit të kemi reshje dëbore, ndërsa e shtuna pasdite duke qenë se vijon rënia e ndjeshme e vlerave termike pritet që të zgjerohet hapësira e reshjeve të dëborës duke bërë që të përfshihen dhe zonat e ulëta, duke përfshirë dhe kryeqytetin, Tiranën, reshje që do të jenë prezent deri paraditen e ditës së diel”, tha ai.
Ndërkohë, temperaturat do të pësojnë ulje ekstreme dhe do të zgjasin përtej të hënës e të martës.
“Sipas parashikimit, temperaturat e ulëta pritet të zgjasin dhe përtej të hënës dhe të martës, duke bërë që të kemi 6 deri në 7 ditë me temperatura ekstremisht të ulëta dhe në zonat e thella malore ta tejkalojnë -16, -17 gradë Celsius.”- ka thënë meterologu.
